வாழ்வியல்

படிக்கப் படாத கடன் ஒப்பந்தம்,

குடிக்க முடியாத கசாயம், 

நடிக்க கிடைக்காத கனவு வேடம், 

கிடைக்கப் பெறாத காதலியின் முதல் முத்தம்

நிறைதலும் நிறைதல் நிமித்தமும் !

குறுஞ்செய்தி

மறை பொருளும்
மீள்பார்வைகளும் 
நகைமுறுவலுமாய்
குறுஞ் செய்திகளின் 
ஊடே நிகழும்
உணர்வுகளின்

உற்சாகப் பிரவாகம்!


  

கவி

புனையும் 

என் கவிதைகள்
பொய்யும் அன்று

புனைச் சுருட்டும் அன்று

இன்னும் புலராத இருட்டு

கவிதாயினி!

குழந்தையுடன்
சைகையால் பேசுவதுபோல் களிப்பானது

காதலை
கவிதையால் 

சொல்வது!

காதல் மொழி!

அவள்

அழகானவளா 

என்பதறியேன்

ஆனால் 

அற்புதமானவள்!

'சுழலும்' வாழ்வு!

கண்கள் கசக்கி
சோம்பல் முறித்தால்

காதில் ஒலிக்கிறது
வீடு மனை விற்கும்
சின்னத்திரை நாயகியின் குரல்!

அடித்து ஓய்ந்த அலாரத்தை
 தலையில் தட்டி குளியலறை உள் நுழைகிறேன்
அலுவலகம் அடைகையில்
ஐந்து நிமிடம் லேட்!

விஷமப் புன்னகையுடன் மேலதிகாரி
அப்புறம் வந்து பாரு என்கிறார்
உறுதியாய் ஒரு சில்லறை வேலை
இன்று மார்க்கெட்டோ, ஸ்கூலோ

பிறகுதான் உறைத்தது
ப்ரேக் பாஸ்ட்சாப்பிடாதது
 கேண்டீனில் வடை, சமோசா
இரைப்பை கதறத் திணித்து
ஜலசமாதி செய்கிறேன்

லஞ்சில் பிரியாணியும் , சிக்கனும் உள்நுழைத்து'
இம்முறை கோக கோலா!
பரபரப்பாய் அலுவலக வேலையில்
இடையில் மூன்று , நான்கு தேநீர்
உள் சென்றிருக்கலாம்
நினைவிலில்லை சரியாய்!

மாலையில் சகாக்களுடன்
அரட்டை வித் சீஸ் பர்கர்!

மாலை திரும்பவும் அதே புகை, வாகனங்கள்

இரவில் அம்மா தந்த இட்லியை
வேணாமென மறுத்து,
பாலைப் பருகி
முகநூலை நள்ளிரவு வரை மேய்ந்து
அலாரம் வைத்து
படுக்கையில் விழுகிறேன்!

வயிற்றிலும்,
மனதிலும்
அமில உணர்வு!

நிதர்சனம்

அவள் திருமணத்திற்கு 

வாழ்த்த வருகிற ,

ஆயிரம் பேர்களில் - நான்

 பெயர் தெரிந்ததொரு முகம் 

முகம் தெரிந்ததொரு பெயர்.......

துரத்தும் நிஜம்

நிழலெனத் தொடரும்  நிஜங்கள் 
திசை திருப்பிட
எத்தனிக்கிறேன்
காரணங்கலெனும்   இரைகளிட்டு...

எறிகின்ற இரைகளில்
பலம் பெற்று
துரத்துகிறது
இன்னும் அதிவேகமாய!

சில நேரங்களில் சில பெயர்கள்!

நினைவில்
நிழலாடும்
பல முகங்கள் !
பெயர்கள் அறியாமல்!

பேசிப் பிரிந்தபின்
நினைவில் வரும் சில பெயர்கள்!

அருகிருப்பவர் விளித்திடுகையில்
அறியப்படும் சில பெயர்கள்!

முழுப் பெயர் என்ன?
என்பதாயும்,
பக்கத்தில் இருப்பவரிடம்
கேட்பதுமாய் தெரியும் சில பெயர்கள்!

விக்கல்களின்
இடையில் சிக்கிடும் சில பெயர்கள்!

வாரங்கள் பல ஆகலாம்

வரவே மறுத்திடலாம்
சில பெயர்கள்

ஞாபகத்திற்கு வராத

பெயர்கள் எல்லாம்
'நல்ல பெயர்கள்'தான்

காதலும், கவிதையும்

காதல்
கவிதைத் தாயின்
செல்லக்குழந்தை!

*
காதலன்றி
மிகச் சிறந்த
கருப் பொருளை
கவிதை கண்டதில்லை

*கவிதை

காதல் ஊருக்கு

நுழைவு சீட்டு

*

கவிதை
காதல் குழந்தையின்
விருப்பப் பாடம்

*
கவிதை
காதல் பெண்
உடுத்தும்
மிகச் சிறந்த ஆடை

*
கவிதை
காதல்தெய்வம்
உவந்து கேட்கும்
பலி
 

*

கவிதை

காதலின்
கல்லறை வாசகம்

*

கவிதை

காதலின்

மறுபிறப்பு

தட(ய)ம்

நிலா முற்றம் நனைத்துச் சென்ற
கார்காலமென 
கடந்து போகிறாய் நீ!,
உலர்ந்து போன  இடங்களிலெல்லாம்

உன் சுவடுகள்  

தேடித் திரிகிறேன் நான்!

மா"நகர்"

நகரத் துவங்குங்கும்
மின் தொடர் வண்டியில், 
சைகை விளக்கில் நிற்கிற
இரு சக்கர வாகனத்தில்,
ஊர்ந்து செல்கிற
மகிழ்வுந்துகளில்,
துவங்குகிறது இனிதே
மாநகரின் காலைப்  பொழுது!

தலைப்புச் செய்தி

நீ தவறவிட்ட  பேருந்து
நதியில் தாவி விழுந்து
தற்கொலைக்கு முயன்றதாய்!

நிதர்சனம்

சமூக வலைதளத்திற்கு

அணிகின்ற

முகமூடி
கழற்றி எறிகிற நொடியில்
யதார்த்தத்தை 

எதிர்கொள்கிறார்
நித்தமும்
நிராயுதபாணியாய்...